Fellsmörk

Fréttir árið 2014

14. júlí 2014
Skuggasniigillinn algengur í Fellsmörk

Snigill í Fellsmörk. Bleytutíðin er uppáhalds fyrir sniglana sem eru út um allt í Fellsmörk þetta sumarið. Þessi er mjög algengur í Fellsmörk núna og er líklega af tegundinni skuggasnigill (Arion subfuscus), Sjá vef Náttúrufræðistofnunar: http://www.ni.is/poddur/nattura/poddur/nr/1118

Þarna er sem sagt ekki um spánarsnigil að ræða.

Ef einhver sér snigil líkjast spánarsnigilinnum of mikið skal hann tekinn og afhentur náttúrufræðistofnun en annars drepinn á staðnum. Upplýsingar um spánarsnigilinn eru hér: http://www.ni.is/poddur/gardur/poddur/nr/964

29. júní 2014
Þegar flugur drepast á laufblöðum

Stundum hefur orðið vart við sérkennilegan pöddudauða á laufblöðum alaskaaspar. Flugurnar virðast hafa orðið fastar við tréð, flestar á laufblaði en nokkrar á stilk eins og næst efsta flugan. Einnig dálítið sérkennilegt að flugurnar eru hvítröndóttar. Erfitt að átta sig á hvort flugurnar hafi aflitast eftir að þær drápust en við leit á pödduvefnum fannt ekki svona hvítröndótt fluga.

Svo er væntanlega til einhver skýring á af hverju þær drepast svona - en þekki hana ekki. Held samt að ég hafi áður séð flugur, dauðar á sama hátt.

Neðri myndirnar tvær eru teknar eftir að búið var að taka laufblaðið af trénu þannig að þær eru í rauninni á hvolfi. Þ.e. flugurnar héngu neðan á laufblaðinu.

2014
Af plöntudegi 2014, 28. júní

Sameiginleg gróðursetning gekk að vanda mjög vel og kláraðist líklega bara á met tíma. Um kvöldið var svo grillað í Dönsku Tó, bústað Hjalta og Júlíu í Króki.

Hægt er að smella á myndirnar til að sjá fleiri myndir frá gróðursetningunni annars vegar og grillveislunni hins vegar. Fleiri myndir er einnig að finna á Fésbókarsíðunni.

- Myndir frá Brynju Jóhannsdóttur
- Myndir frá Júlíu Andersen

25. júní 2014
Plöntudagurinn er um helgina, laugardag 28. júní

Frá sameiginlegri gróðursetningu í júní 2013

Gróðursetning í sameiginlegt svæði
Fyrirhugað er að gróðursetja um 2.680 plöntur frá Landgræðsluskógum í sameiginleg svæði á gróðursetningardaginn. Mæting er við Fell innan við gömlu hlöðuna að austan, þar sem við höfum gróðursett undanfarin ár, kl. 13.00 – stundvíslega.

Áður en verk hefst verður farið yfir það sem gera á – því er mikilvægt að þátttakendur mæti stundvíslega.

7 þúsund plöntur til gróðursetningar á reitum landnema:
Deilt verður út rúmlega 7.000 plöntum á landnemaspildur þegar sameiginlegri gróðursetningu lýkur og er mælst er til þess að plöntuskammtar séu teknir þennan dag.

Plönturnar verða staðsettar í Keldudal í landi Helgu og Auðuns, eftir 20. júlí verður öllum frjálst að taka ósóttar plöntur.

Sameiginlegt grill í Dönskutó:
Eftir gróðursetningu er fyrirhugað að grilla saman við Dönskutó, Krók 10, hjá Hjalta og Júlíu, þar sem kynt verður upp í kolunum.

Hafið með ykkur mat, drykki og annað sem þarf til mannfagnaðar og grillveislu af þessu tagi ( kol +grill + pappadiskar + mál + hnífapör).

Gaman væri ef einhver hefur tök á að taka með hljóðfæri til undirleiks við fjöldasöng ef sá gállin verður á fólki.

Skil á plöntubökkum:
Landnemar eru minntir á að skila tómum plöntubökkum í gömlu hlöðuna á Felli. Áhöldum, sem fengin hafa verið að láni hjá Skógræktarfélagi Reykjavíkur, þarf að skila strax eftir sameiginlega gróðursetningu þ. 28. júní í gömlu hlöðuna að Felli.

Hittumst heil á Fellsmörk – Skógarkveðjur!

Undirbúningshópurinn
Júlía P. Andersen sími 553 6753 farsími 856 0303 julia@ask.is
Valdimar Reynisson sími 437 1910 farsími 860 4924 valdi@skogur.is
Þorvaldur Ólafsson sími 553 6114 farsími 863 8748 thorvo@ismennt.is

Geispan notuð við gróðursetningu

15. maí 2014
Aðalfundur 2014 haldinn á Elliðavatni 14. maí

Aðalfundur Fellsmerkur var haldinn á Elliðavatni 14. maí 2014.

Talsverðar umræður urðu á fundinum um stöðu mála varðandi þinglýsingar landnemasamnina og leyfi til bygginga landnema. Bréf hafa borist frá yfirvöldum þar sem landnemum sem hafa ekki þinglýsta leigusamninga er hótað því að sumarbústöðum þeirra verði þinglýst á ríkið og þeir missi þar með eignarrétt sinn yfir þeim. Landnemar sem höfðu hafið byggingu geta ekki haldið áfram og öðrum er haldið í óvissu um hvort þeir fái að byggja nokkurn tíman. Á sama tíma eru landnemar látnir borga leigu skv. óþinglýstum samningum sem þó fela í sér byggingarleyfi. Hafa landnemar greitt árlega í samræmi við slíka samninga í meira en 20 ár.

Félagar sem hafa skipað stjórn Fellsmerkur síðasta árið gáfu kost á sér áfram og var endurkjörin á fundinum.

Á fundinum flutti Páll Einarsson jarðeðlisfræðingur erindi um jarðfræði og umgjörð eldstöðvarinnar í Kötlu

-- > Erindi Páls á PDF formi

1. maí 2014
Aðalfundur 2014 boðaður og tímasetning plöntudags

Fundarboð aðalfundar hefur verið sent út til félagsmanna og verður aðalfundurinn haldinn á Elliðavatni, miðvikudaginn 14. maí og hefst fundurinn kl. 20:00.

Á fundinum verða hefðbundin aðalfundarstörf í samræmi við lög félagsins en einnig mun jarðsvísindamaðurinn Páll Einarsson fjalla um hugsanlegar afleiðingar af Kötlugosum fyrir Fellsmörk.

Fundaboð á PDF formi er hér.

Einnig er búið að tímasetja árlegan sameiginlegan gróðursetningardag og er miðað við laugardag 28. júní 2014. Nánari upplýsingar um plöntudag verða sendar út er nær dregur.

30. apríl 2014

Vorið komið á Fellsmörk í lok apríl

Loðbrúskarnir springa út á víðinum.

Það vorar nokkuð vel á Fellsmörk og þrátt fyrir sögur af skemmdum girðingum þá kemur gróðurinn ekki illa undan vetri - a.m.k. ekki þar sem verið var á Hlíðarbraut sunnudag 27. apríl.

Eknar voru allar aðalgötur og er staða þeirra nokkuð góð miðað við undanfarin ár. Klifandi hefur ekki skemmt slóðana fyrir neðan vesturhluta Fellsmerkur og eru þeir þokkalega greiðfærir. Sama má segja um slóða á austurhluta Fellsmerkur. Vegir eru hins vegar grýttir og á það kannski helst við um veginn frá Pétursey inn að Felli.

Geymsluskúr eða Kamar við Heiðarbraut hefur svo fokið til í vetur og brotnað, sjá mynd hér til hliðar.

Sigurjón í Pétursey hefur haft auga með girðingum og eru þær hins vegar illa farnar eftir veturinn og töluverð vinna við lagfæringar á þeim.

Landnemar og aðrir sem vita um skemmdir eða einhver verkefni sem þarf að vinna ættu að snúa sér til stjórnar félags landnema þannig að verkin komist í framkvæmd.

Myndir frá vorinu eru hér.